திங்கள், டிசம்பர் 28, 2020

பிடிகொம்பு

பிடிகொம்பு

[வல்லமை இதழின் 289-ஆவது படக்கவிதைப் போட்டிக்கு அனுப்பிய கவிதை] 


வெட்டி ஒட்டி கச்சிதமாய் இணைத்து
தட்டிச் செதுக்கும் சிற்பியைப் போல்
கட்டி அழகு பார்க்க வைக்கும்
ஆடைகள் தைத்துக்கொள்ள யாருமில்லை….

பல்பொருள் அங்காடிகளால் படுத்துவிட்டப்
பக்கத்து மளிகைக்கடை…
இணையவழி வணிகத்தால் அழிந்துவரும்
சிறுவணிகக் கூட்டம்…
துரித உணவைப் போல் கேட்டதும்
துரிதமாய்க் கிட்டும் தைத்த ஆடைகள்…
வசதியற்றோரின் வாழ்வாதாரம்
கிழிந்துப்போனது நிறுவணப்படுத்தலால்…

சுகத்தைக் கெடுக்கும் நுண்ணுயிரி
முகத்தை மூடும் கவசம் தைத்து
பசியைத் தீர்க்க வழிசெய்த நிலைமை என
அடித்துச் செல்லும் காலச்சுழற்சி வெள்ளத்தில்
பிடிகொம்புகள் சில கிட்டும் அவ்வப்போது!!


வெள்ளி, டிசம்பர் 25, 2020

ஈசன் வந்து சிலுவையில் மாண்டான்... (பகுதி-5)

யோவான்

ஈசன் வந்து சிலுவையில் மாண்டான்... (பகுதி-5)

(இதன்  பகுதி-1, பகுதி-2, பகுதி-3, பகுதி-4)

யூதத் தொன்மத்தில் ஏசுவைப் பற்றி ஓரளவு அனைவரும் அறிந்திருப்போம். ஆனால் நாம் இங்கு முதலில் பார்க்க இருக்கும் தொன்மம் வேறொருவர் தொடர்புடையது. அவர் பெயர் யோவான் (ஜான் - John). ஜான் என்பதை விட 'ஞானஸ்நான ஜான்' (John, the Baptist), அல்லது "ஞானத்தில் மூழ்கடிப்பவர்” (John the immerser), ஸ்நானகர் (baptizer) என்பவை தான் அனைவராலும் அறியப்படும் பெயர். இவர் கிருஸ்துவமதத்தின் மிக முக்கியமானவர்களுள் ஒருவராக கருதப்படுகிறார். இவர் தான் பழைய ஏற்பாடுக்கும் புதிய ஏற்பாடுக்கும் (Old Testament and New Testament) பாலமாக இருப்பவர் இவர் ஏசுவுக்கு முன்னவராக தேவதூதனின் வரவை அறிவிப்பவராகவும் தேவதூதன் மீது பரிசுத்த ஆசி இறங்கியதற்கு சாட்சியாகவும் இருப்பதாகக் கருதப்படுகிறார். பழைய ஏற்பாடுகளில் கூறப்படும் தேவதூதன் எலியாஸ்-இன் மறுவடிவம் தான் இவர் என்றும் சிலர் கூறுகின்றனர்.

புதிய ஏற்பாடுகளின் படி  இவரும் ஏசுவும் உறவினர்கள். ஏசுவைவிட வயதில் சில மாதங்கள் மூத்தவர். இவரது தாய் எலிசபெத் மரியாளின் உறவினர். அவருக்கு 60 வயதில் ஜான் பிறந்ததாகக் கூறுவர். மரியாள் கன்னியாக கருவுறுவாள் என்பதை நம்பாததால் அதை மெய்பிக்க தாய்மை பருவம் தாண்டிய எலிசபெத் கருவுற்று அதை நிரூபித்ததாகவும் கூறப்படுவதுண்டு. அதையும் முதலில் நம்பாத செக்கரியாவை ஜான் பிறக்கும் வரை ஊமையாக ஆகும் படி சபித்ததாகவும் பின்னர் குழந்தைப் பிறந்தவுடன் அதற்கு யாருடைய பெயர் வைக்கவேண்டும் என்று கேட்ட பொழுது ‘ஜான்’ என்ற பெயர் வைக்குமாறு செக்கரியா சொல்லும் பொழுதுதான்  அவருக்கு மீண்டும் பேச்சு வந்ததாகக் கூறப்படுகிறது. மக்கட்தொகைக் கணக்கெடுப்பின் பொழுது மரியாள்-ஜோசப் உடன் எலிசபெத் அவள் கணவன் செக்கரியா, குழந்தை ஜானுடன் ஜெருசெலம் சென்றதாகவும் கூறப்படுவதுண்டு.

இவர் ஏசுவிற்கு முன்னரே ஜோர்டான் நதிக்கரையில் அனைவருக்கும் ஞானஸ்நானம் செய்வித்தவர் என்பதால் இவருக்கு ‘ஞானஸ்நான யோவான்’ என்ற பெயரே நிலைத்தது. பழைய ஏற்பாடுகளின்படி, இவர், ஏசு அறிவிக்கபடுவதற்கு முன்வரை பாலை நிலத்தில் வாழ்ந்ததாகக் கூறப்படுகிறது. இஸ்ரேலியர்களை (யூதர்கள்)ப் பொருத்தவரை இவர் பாலைவனத்தில் இருந்த பல துறவிகளில் ஒருவராகக் கருதப்படுகிறார். அப்பொழுது, இறைவாக்குப்படி தேவதூதனின் வருகையை அறிவித்து அனைவருக்கும் ஞானஸ்நானம் செய்வித்ததாகக் கூறுவர். ஏசுவிற்கும் கூட இவரே ஞானஸ்நானம் செய்வித்தவர் என்றும் கூறுவர். ஏசுவிற்கு ஞானஸ்நானம் செய்யும் பொழுது அவர் ஜோர்டான் நதியில்  இறங்க, வானைப் பிளந்து, பரிசுத்த ஆவி ஒரு புறாவைப் போல அவர்மீது இறங்கியதாகவும் கூறுவர்.

யோவான் ஒட்டகமுடியால் செய்த ஆடையை அணிந்து, தோல் கச்சையை கட்டியவராகவும் வெட்டுக்கிளியையும் காட்டுத்தேனையும் உண்டு வாழ்ந்தவர் என்றும் குறிப்பிடப்படுகிறார்.

ஏசுவே இவரைப் பற்றிக் கூறும் பொழுது, மனிதராய் பிறந்தவர்களுள் ஞானஸ்நானம் செய்ய யோவானைவிடப் பெரியவர் எவரும் தோன்றியதில்லை என்று புகழ்ந்ததாகக் கூறுவர்.

ஏசுவைப் போலவே இவர் அதிகாரத்தில் இருந்தவர்களின் தவறுகளையும் சுட்டிக்காட்டத் தயங்கியதில்லை. அதனாலேயே, ஹெராத் மன்னன் அண்டிபஸ் அவன் தமையன் பிலிப்-இன் மனைவி ஹெராதியாவை தன் மனைவியாக்கிக் கொண்டதைக் (இருவரும் தாங்கள் இருவரும் திருமணம் செய்து கொள்ள வேண்டும் என்ற ஒரே காரணத்திற்காகவே, தங்களுடைய கணவன், மனைவி ஆகியோரை தள்ளி வைத்தனர்) கண்டித்தார். இதனால், ஹேராதியா அவரை தண்டிக்க நினைத்தாள். ஆனால், அண்டிபஸ் அவருக்கு எதிராக எதுவும் செய்ய அஞ்சினான். ஆனால், ஹெராதியா அவரைக் கொல்ல தகுந்த சந்தர்பத்தை எதிர்பார்த்துக் காத்திருந்தாள். தன் பிறந்தநாள் விழாவில் ஹெராதியாவின் மகள் ஆடிய நடனத்தைக் கண்டு மகிழ்ந்த மன்னன் அவளிடம் அவளுக்கு வேண்டிய பரிசைக் கோருமாறு கூறினான். அவள், தன் தாயின் தூண்டுதலால், யோவானின் தலையை ஒரு தட்டில் வைத்துத் தருமாறு கோர, ஹெராத் தன் வீர்ர்களிடம் அதை நிறைவேற்றுமாறு கட்டளியிட, அவர் கொல்லப்பட்டார்.

இஸ்லாமியர்களைப் பொறுத்தவரை அவர்கள் இவரை ஜெஹியா (அ) யாஹியா என்று குறிப்பிடுகிறார்கள். மிராஜ் இரவு வான் பயணத்தின் பொழுது முகமது நபி ஸல் அவர்கள் பல நபிகளைச் சந்தித்த்தையும் சிலருடன் பேசியதையும் – ஆபிரகாம் (இப்ராஹிம்), ஏசு (ஈசா), ஜான் (யாஹியா), மோசஸ் (மூசா) - குறிப்பிடுகிறார்கள். அதில் இரண்டாம் தளத்தில்/அடுக்கில் ஏசு, ஜான் (ஈசா, யாஹியா) சகோதரர்களை சந்தித்ததாகக் குறிப்பிடுகின்றனர்.

இதன் அடுத்த பதிவு....

புதன், டிசம்பர் 23, 2020

ஈசன் வந்து சிலுவையில் மாண்டான் (பகுதி-4)

இதாகாவில் ஒடிஸியஸ்

ஈசன் வந்து சிலுவையில் மாண்டான்... (பகுதி-4) 

(இதன்  பகுதி-1, பகுதி-2, பகுதி-3)

ஓடிஸியஸ், இவ்வாறு பல நாட்கள் தன் தாய் நாடு திரும்பி வர பயணம் மேற்கொண்ட நேரத்தில் அவனது மனைவியும் மகனும் பல சோதனைகளைச் சந்தித்தனர். பல வருடங்களாகத் தன் தந்தை திரும்பாததால், அவன் மகன் டெலிமாசஸ் (20 வயது), ஓடிஸியஸைத் தேடிச் சென்றான். தனியாக இருந்த அவன் மனைவி பெனலோப்-ஐ, தங்களை மணக்குமாறு (அவள் அழகாலும், அவள் மூலம் அந்த ராஜ்ஜியத்தையும் ஆள முடியும் என்பதாலும்). ராஜ குடும்பத்தைச் சேர்ந்த பலரும் (அவளின் சுயம்வரத்தில் வந்த 108 பேர்கள் என்றும் சில இடங்களில் குறிப்பிடப்படுவதுண்டு) வற்புறுத்த ஆரம்பித்தனர். பல வருடங்களானதால் ஓடிஸியஸ் இறந்துவிட்டான் என்றும், அதனால் அவள் தங்களில் யாரையாவது மணக்க வேண்டும் என்று தினமும் அவளுக்குத் தொல்லைத் தர ஆரம்பித்தனர்.

அவர்களின் தொல்லையை தவிர்க்க தான் தன் கணவனுக்கு இறுதி மரியாதைச் செலுத்தும் வண்ணம் அவனுக்குக் கோடித்துணி (மரணத்தில் போர்த்தும் துணி) நெய்வதாகவும் அந்த வேளையை முடித்த பின்னர் தான் தன் திருமணத்தைப் பற்றி முடிவெடுக்க முடியும் என்று கூறி சமாளித்தாள். அதன்படி, பகல் முழுவதும் துணியை நெய்து, இரவில் யாருக்கும் தெரியாமல் அதை பிரித்து விடுவாள்.

ஏதென்னா கடவுளின் ஆசியுடன் ஸ்பார்டா சென்றடைந்த டெலிமாசஸ், அங்கு மெனலாஸ்-ஐ சந்தித்தும் ஓடிஸியஸ் சென்ற இடம் தெரியாமால் மீண்டும் தன் நாட்டுக்கேத் திரும்பி வந்து விட்டான்.

இந்நிலையில், இப்பொழுது தன் நாடு திரும்பிய ஓடிஸியஸ் தன் நாடும் வீடும் இருக்கும் நிலை தெரியாமல் உள்ளே செல்லக் கூடாது என்று எண்ணி, ஒரு பிச்சைக்காரனாக வேடமிட்டு, தன் மாளிகைக்குச் சென்றான். அங்கு அவனுடைய விசுவாசியான பன்றி மேய்பவனான யூமயூஸ்-ஐ முதலில் சந்தித்து, அவன் மூலம் தன் மனைவிக்கு ராஜவம்சத்தைச் சேர்ந்தவர்கள் தரும் தொல்லைகளைத் தெரிந்து கொண்டான்.

பின்னர், அதே வேடத்திலேயே, தன் மனைவியையும் சந்தித்தான். அவளால் அவனை அடையாளம் கண்டுகொள்ள முடியவில்லை. அவளிடம், தான் வெளி தேசத்திலிருந்து வருவதாகவும், ட்ராஜன் போரை நேரில் பார்த்த்தாகவும் அதில் ஒடிஸியஸ் செய்த வீர தீர பராக்ரமங்களையும் விவரித்தான். அதைக் கேட்ட பெனலோப்-இன் கண்களில் நீர் வழிந்தது. அவளைத் தேற்றி, அவளைத் திருமணம் செய்ய எண்ணுபவர்களுக்கு ஒரு போட்டி வைக்கச் சொன்னான். ஓடிஸியஸின் வில்லை நாண் கோர்த்து 12 கோடாலிகளை ஒரே அம்பால் தூளைக்க வேண்டும் என்பதே அந்த போட்டி. அவளது கட்டளைப்படி, டெலிமாசஸ்-ஐ இந்தப் போட்டியை நடத்தினான்.

போட்டியில் யாராலும் அந்த வில்லை நாணேற்ற முடியவில்லை. இறுதியில் ஓடிஸியஸே அந்த வில்லை நாணேற்றி 12 கோடாலிக் கொம்புகளையும் ஓரே அம்பால் துளைத்தான். அதன் பிறகு, ஒரு பிச்சைக்காரன் போட்டியில் வென்றதால் அங்கு பெருங்குழப்பம் ஏற்பட்டது. தன்னை யாரென்று வெளிப்படுத்திய ஓடிஸியஸ், தன் மகன் டெலிமாசஸ், யூமயூஸ் ஆகியோருடன் சேர்ந்து அவர்கள்  அனைவருடனும் சண்டையிட்டு அவர்களை அழித்தான். எதிரிகளின் விசுவாசிகள் அனைவரும் கொல்லப்பட்டனர்.

இந்தக் கூச்சலையும் குழப்பத்தையும் கேட்டு மனங்கலங்கிய பெனலாப், அந்தப் பிச்சைக்காரன் தான் தன் கணவன் என்பதை நம்ப மறுத்தாள். அதனால், அவனை வேறொரு சோதனைக்கு உள்ளாக்கினாள். அவனை அவள் அறையில் உள்ளக் கட்டிலைத் தூக்கி சபையில் வைக்குமாறு கூறினாள். இதைக் கேட்ட ஓடிஸியஸ் அந்தக் கட்டிலை கடவுளின் அருளால் தான் தன் கைகளாளேயே செய்த்தாகவும் அந்த மரத்திற்கு (கட்டிலுக்கு) இன்னமும் உயிர்  இருப்பதால் அதை அங்கிருந்து யாராலும் பெயர்க்க முடியாது என்றும் கூறினான். இதைக் கேட்ட பெனலாப், இது தனக்கும் ஓடிஸியஸுக்கும் மட்டுமே தெரிந்த உண்மை என்பதால், அவன் தன் கணவன்தான் என்பதை உணர்ந்தாள். அவர்கள் மீண்டும் இணைந்தார்கள்.

ஹோமெர்-இன் ஓடிஸியஸில் கதை இத்துடன் முடிந்துவிடுகிறது. ஆனால், உத்தர ராமாயணம் போல் இதன் பிறகும் ஓடிஸியஸின் கதை இருக்கிறது. அவன் செய்த துரோகங்களும் கொலைகளும் அவனை நிம்மதி இல்லாமல் இருக்க வைத்தன. முக்கியமாக, ட்ராய் மக்களை தான் ஏமாற்றியதும் ஹெக்டரின் மகனை சுவற்றில் அடித்துக் கொன்றதும், தன் நண்பர்களை தெரிந்தே ஸ்கைலாபிடம் காவு கொடுத்ததும் தன் சொந்தங்களான ராஜ வம்சத்தினரைக் கொன்றதும் அவனை பெரிதும் வாட்டியது. தன் நணபர்கள், பங்காளிகளின் தாய்-தந்தையரின் சாபம் தன்னை ஏதாவது செய்துவிடும் என்று அஞ்சினான். தன் மகன் டெலிமாசஸ்-க்கு அரசாட்சியை அளித்து, மனைவி பெனலாப்-ஐயும் விட்டுவிட்டு யாருக்கும் சொல்லாமல் வெளியேறினான்.

இவை அவனுக்கு முன்னமே தீர்க்கதரிசி டைரேசியஸ் மூலம் தெரிந்திருந்த்து. அவர் அவனிடம் அவனை கப்பலின் துடுப்பை என்ன என்று அறியாத மக்கள் வாழும் நாட்டை அடைந்தால் தான் அவனுக்கு அமைதி கிடைக்கும் என்று கூறியிருந்தார். அதன்படி அவன் தன் கையில் ஒரு துடுப்பை எடுத்துக் கொண்டு நாடு நாடாக அலைந்தான்.  பல வருடங்களுக்குப் பின் அவன் கடல் என்பதே அறியாத இடத்திற்குச் சென்று அங்கு வாழ்ந்ததாக கூறப்படுகிறது. அங்கு அவன் துடுப்பு தானியம் தூற்றும் விசிறியாக மாறியது. [இது கடலோடியாகவும் நாடோடியாகவும் இருந்த மனிதன், ஓரிடத்தில் தங்கி விவசாயத்திற்கு மாறியதைக் குறிப்பிடுவதாகவும் இருக்கலாம்].

இப்பொழுது நாம் நம் தலைப்பிற்கு வருவொம். ஈசன் ஏசு இந்த விஷயத்திற்கும் ஓடிஸியஸுக்கும் என்ன சம்பந்தம். ஈசன் – இந்திய தொன்ம்ம் தொடர்புடையது; ஓடிஸியஸ் க்ரேக்க தொன்ம்த்தைச் செர்ந்தது. ஏசுவோ யூத தொன்மத்தைச் சேர்ந்தவர். எனவே நாம் அந்தத் தொன்மத்தையும் சற்று பார்ப்போம்.

ஞாயிறு, டிசம்பர் 20, 2020

கொத்தடிமைக் கடவுள்கள்

கொத்தடிமைக் கடவுள்கள்

[வல்லமை இதழின் 288-ஆவது படக்கவிதைப் போட்டிக்கு அனுப்பிய கவிதை] 



பொதுவெளியில்….
பெண் சக்தி தெய்வமென்று
கற்சிலைக் கடவுளாக்கிப்
பூசனைகள் பல செய்து
கருவறையில் தொழுதிருப்போம்!

விட்டினிலோ….
படுக்கையைறை தாசியாக்கி
பணிவிடைகள் செய்ய வைத்து
காரிகையைக் கொத்தடிமையாக்கி
அடுக்களையில் அடைத்து வைப்போம்!

கலைகளின் தேவியென்று
கொண்டாடி வணங்கவும் வேண்டாம்
சதிராடும் தாசியென்று
சாக்கடையில் எறியவும் வேண்டாம்!

அன்னையடி நீயென்று
அன்புச் சங்கிலிப் போட்டு
அடிமையாக்கி வைத்திருக்கும்
அவலநிலை இனி வேண்டாம்!

சக மனிதப் பெண்ணுக்கு
சம உரிமைக் கிட்டி – அவள்
சாதனைகள் சபையேறும்
சமச்சீர்மை நிலை போதும்!!!

புதன், டிசம்பர் 16, 2020

மார்கழி

மார்கழி



காரிருளை நீக்கிவிடும்

கதிரவனை வரவேற்க

வானவீதி வாசலிலே

வண்ணக்கோலமிட்டு எழில் கூட்ட

வானமகள் பனிநீர் தெளித்து

குளிர்விக்கும் நேரமிது!


பாவையர்கள் அதிகாலை

கூவினம்போல் முன் எழுந்து

நோன்பிருந்து பூசையிட்டு

குலம் விளங்கக்I கோலமிட்டு

கூடிநின்று கொண்டாடி

சிறப்பிக்கும் காலமிது


பாடகர்கள் காணமிட

நர்த்தகர்கள் ஆடிவர

கலைகள் பரிணமித்து

காண்போரைப் புணர்ப்பிக்கும்

பண்பாட்டை மீட்டெடுக்கும்

பணி சிறக்கும் மாதமிது...


வெள்ளி, டிசம்பர் 11, 2020

இரையாகத் துடிக்கும் புழுக்கள்


இரையாகத் துடிக்கும் புழுக்கள்

 [வல்லமை இதழின் 287-ஆவது படக்கவிதைப் போட்டிக்கு அனுப்பிய கவிதை] 

 


கருமுட்டைதனிலிருந்து
உயிர் கொண்டு,
மேல்புழுவாய் வளர்ந்து
சிறகு வளர்த்து
சீர்வண்ணப் பூச்சியாகி
உலகளந்து ஊர் மெச்ச வலம்வந்து
மலரமர்ந்து
மதுரத்தேன் தான் குடித்து
முழுவாழ்க்கை வாழ்ந்திடாமல்
சிறுத்தொகைக்கும்
சிற்றின்ப போதைக்கும்
சாதிமதச் சார்பு கொண்டும்
மதுக்கோப்பைக் குப்பிக்கும்,
ஆள்பவரை அமர்த்தவைக்கும்
வாய்ப்பதனைத் தவறவிட்டு
ஆண்டுகள் ஐந்தும் அழுதுநின்று
அரசியல் வல்லூறுகளின் அலகினிலே
இரையாகத் துடிக்கும் புழுக்களெனப்
புரியாமல் தவிக்கின்றோம்…

புதுத்தேர்தல் வரும் நேரம்!
புதுப்பாதை வகுப்போமா? – அன்றி
புதைச்சேற்றில் வெளியேற வழியின்றி
புலம்பல்களை மொழியாக்கி
தலைவிதியை நொந்திருந்து
தவிப்பதையேத் தொடர்வோமா?


(இது இவ்வாரத்தின் சிறந்த கவிதையாகத் தேர்ந்தெடுக்கப்பட்டது)

சனி, டிசம்பர் 05, 2020

மெய் இன்பம்

மெய் இன்பம்

 [வல்லமை இதழின் 286-ஆவது படக்கவிதைப் போட்டிக்கு அனுப்பிய கவிதை] 




துள்ளிக் குதித்து வானம் தொட்டு
உள்ளம் உவந்துக் களித்திருக்க
நித்தமும் ஏங்கித் தவித்திருந்தால்
இன்பம் கிட்டிட வாய்ப்பு இல்லை..

வெள்ளத்தளவே மலர் நீட்டம் என்று
வள்ளுவம் கூறும் கூற்றைப் போல்
தெள்ளிய சிந்தையின் வழிவந்த
தன் திறம் இன்றி தந்திரம் இல்லை…

வெள்ளை மனமும் கருணைக் குணமும்
உள்ளவர் இன்பம் அழிவதில்லை
கள்ளும் கயமையும் தந்திடும் களிப்பு
காலம் முழுவதும் தொடர்வதில்லை…

தொல்லிய பெரியோர் உரைத்தது போல்
நல்லறம் செய்து உய்தலன்றி
இந்திரன் உலகம் எட்டிடவே
மந்திரம் ஏதும் இங்கு இல்லை!