திங்கள், பிப்ரவரி 17, 2020

பொன்னூஞ்சல்

பொன்னூஞ்சல்
[வல்லமை இதழின் 245-ஆவது படக்கவிதைப் போட்டிக்கு அனுப்பிய கவிதை]


உறவென்றக் கயிறு கட்டி
உணர்வென்ற அச்சில் சுழல
மனமென்னும் காற்று ஆட
மணமக்கள் ஆடும் ஆட்டம்!

சொந்தங்கள் வாழ்த்துரைக்க
சீதையுடன் இராமனென
சந்ததிகள் தொடர்ந்துவாழ - இன்பச்
சன்னிதியில் ஆடும் ஆட்டம்!

சோர்வுற்ற நேரமெல்லம் சொந்தமெனத் தாகம்தீர்த்து
பருவம் கடந்த பின்னும் பரிவுடன் நீர்த்திருந்து
மேடுபள்ளம் தாண்டி ஜீவநதியாய் ஓட
இல்லறத்தின் இன்பம் காணும் துவக்க ஆட்டம்!

புதன், பிப்ரவரி 12, 2020

திட்டமிடு

திட்டமிடு
நிலையாமை நித்தியமென்று
நித்தமும்தான் சோகங்கொண்டு
சித்தமது கலங்கி நாளும்
சோம்பற்கொண்டு சுருங்கிடாமல்
சிறுகிளையில் இடங்கண்டு
சுயமுயற்சி தான்கொண்டு
தனக்கென்று கூடு கட்டும்
திறமதனைக் கற்றிடுவோம்…
சிட்டதனின் வாழ்க்கையிங்கு சிலநாட்கள் என்றாலும்
கிட்டிய வாழ்நாளைச் சோம்பலின்றி
கட்டமைத்துக் கடமையாற்றும் பண்பு கற்று
திட்டமிட்டுச் சீரமைத்து வாழ்ந்திடுவோம்…

திங்கள், பிப்ரவரி 03, 2020

விளையும் பயிர்

விளையும் பயிர்


சிறுகடுகு என்றாலும் அதன் காரம் குறைவதில்லை
சிறுமனிதன் என்று எண்ணித் துவளுவதில் ஞாயமில்லை
தீச்சுடரைக் கானகத்தில் இட்ட கதை அறிவோம்!
தத்தரிகிட நாதம் நமது நெஞ்சினிலே வைப்போம்..

சின்னத் துளிகள் என்று ஏண்ணி
துடைத்தழிக்க நினைப்போர் இருந்தாலும்
மடைகள் உடைக்கும் வெள்ளமாய் மாறி
தடைகள் தாண்டிச் சென்றிடுவோம்…

காரியம் யாவும் செய்திடும் வகையில்
வீரியம் கொண்ட விதையாய் ஆகி
விண்ணைத் தொடும் விருட்சமாய்ப் படர
மண்ணைப் பிளந்து முளைத்திடுவோம்…

செவ்வாய், ஜனவரி 28, 2020

குறிஞ்சிப் பண்

குறிஞ்சிப் பண்
[வல்லமை இதழின் 242-ஆவது படக்கவிதைப் போட்டிக்கு அனுப்பிய கவிதை]

 

வண்டு சுழன்றிடும் சோலைமிடை காதல்
கண்டு உயிர்வாழ்ந்து பரிணமிப்பாய்
வெட்கங் கொண்டக் கொடிச்சியினை - கடுவனே
வேட்கையுடனேச் சேர்ந்திருப்பாய்

கொட்டும் சாரல் வெட்கைத் தவிர்க்க
கானவன் தோள்களில் சாய்ந்திடுவாய் - அது
வானவர் உலகையே காட்டுமென்ற
வள்ளுவன் வாக்கை மெய்பிப்பாய்

நேற்று இன்று நாளையின்றி
நித்தமும் நிலைக்க வைத்திடுவாய்
காற்றிடை நுழையாக் காதல் கொண்டு - குறிஞ்சிக்
காவியம் தளிர்க்கச் செய்திடுவாய்

திங்கள், ஜனவரி 20, 2020

மனிதம் பழக்கு

மனிதம் பழக்கு
[வல்லமை இதழின் 241-ஆவது படக்கவிதைப் போட்டிக்கு அனுப்பிய கவிதை]


அலை வீசும் கடற்கரையின் அழகை ரசிக்க வேண்டும்
அலைபேசிச் சத்தம் இன்றி அமைதி கொள்ள வேண்டும்
கணினியிலே விளையாடல் நிறுத்தி வைக்க வேண்டும்
களத்தினிலே ஆட வைத்துக் களித்திருக்க வேண்டும்

மணற்வீடு கட்டி மழலை மகிழ்ந்திருக்க வேண்டும்
புணல்தோறும் ஆடி நாளும் பொலிந்திருக்க வேண்டும்
சோர்வளிக்கும் தனிமையினைத் தூரந்தள்ள வேண்டும்
கூடி வாழ்ந்து கோடி நன்மைப் பெற்று வாழ வேண்டும்

வீட்டினிலே அடைந்திடாமல் வெளியில் பார்க்க வேண்டும்
ஏட்டுப் படிப்பு மட்டுமன்றி எல்லாந் தெரிய வேண்டும்
கிணற்றுத் தவளையல்ல உலகஅறிவு கைக்கொள்ள வேண்டும்
சுற்றத்தோடு வாழவைத்து மனிதம் பழக்க வேண்டும்


புதன், ஜனவரி 15, 2020

தைப்பொங்கல் கோலம்


தைப்பொங்கல் கோலம்




 


வாழும் மக்கள் வயிற்றுப்பிணித் தீர்த்துவிடும் கோலம்
வஞ்சமில்லா நெஞ்சம் மகிழ் பச்சைப்பசுங்கோலம்
கழனிபுகு விவசாயி கதி உயர்த்தும் கோலம்
உழவுக்கும் உழைப்புக்கும் உயர்வளிக்கும் கோலம்!

கதிரவனின் தேர் திரும்ப வரவேற்கும் கோலம்
நிலமடந்தை கதிராடை உடுத்தி நின்றக் கோலம்
பசுஞ்சோலைப் பூக்கப் பிஞ்சு மொட்டுவிடும் கோலம்
வசந்த காலம் வருவதையே கட்டியஞ்சொல்லும் கோலம்!

காடுவளர் காளைக்கெல்லாம் கணிவளிக்கும் கோலம்
கன்னிப்பெண்கள் குடி உயர்த்தும் கதிர்மணிக் கோலம்
கூடி நாமும் வாழவழிச் செய்யும் சீர்க் கோலம்
கன்னித் தமிழ்நாடு போற்றும் தைப்பொங்கல் கோலம்!

திங்கள், ஜனவரி 13, 2020

எதிர்காலப் பொங்கல்


எதிர்காலப் பொங்கல்
[வல்லமை இதழின் 240-ஆவது படக்கவிதைப் போட்டிக்கு அனுப்பிய கவிதை]



விளை நிலங்கள் தனையெல்லாம்
விலைக் கொடுத்து வாங்கி,
வீடுகட்டிப் பார்க்க எண்ணும் ஒரு
வித்தகரின் கூட்டம்

சோறு போடும் நிலங்களையே
கூறுபோட்டுப் பார்த்து - எரி
வேதிபொருள் தேட தினம்
விழைந்திடுமோர் அரசு

பாடுபட்டு உழைத்து செங்கதிர்
பயிர்வளர்த்து வந்த மண்ணில் வேறு
நாட்டதனின் கூட்டம் தினம்
செய்யும் பல ஆய்வு

நிலைதிருத்தி விதிமாற்ற
வழியேதும் எண்ணிடாமல்
வெள்ளித்திரை வழியே தலைவனைத்
தேடும் மக்கள் கூட்டம்

மகிழ்ச்சி கொண்டு குடும்பத்துடன் கொண்டாட
கதிர், கரும்பு எழிற்கோலம் ஏதுமின்றி
நெகிழிப் பானையில் பஞ்சு பொங்கல் வைத்து
கொண்டாடும் நம் எதிர்காலச் சமுதாயம்!